Читать книгу Гьиссерин кимел онлайн

26 страница из 28

ТIЕМ

Вердиш я чун дегьнеда

Хуьз дердерин хараяр.

Са гъвечIи хвеш атайла,

Хъиткьинда рикI хуравай.

Ялгъузвили кукIварда

Чун кIвале авайла тек,

Хайибур кIевевайла,

Аквадан вилиз пек-лек?

Гатфари тIебиатдин

Дегишдайвал сугъул ранг,

Гьар са верцIи гафуни

КIевирда дуствилин танг.

Санал тIуьр са кап фа хьиз,

Са куьнини гудач дад,

Садвилив фад кьаз жеда

Гьар са тIалдин вилик пад.

Чи уьмуьрдин кьилин тIем

Хайибурни мукьвабур!

Абур квачиз дуьньядихъ

Я дад жедач, я абур!

29.01.2021

ГЬИССЕРИН КИМЕЛ

Хъуьрен тийиз бахтунин рагъ,

Месевай зун хьана начагъ.

Авазвай мад чIичI ийиз йиф,

Чандиз тIалар жезвай илиф.

Рам тежез фикиррин кIеле,

Гьатнавай зун гъамдин меле.

Алахьайла мурадрин сел,

Алах жезвай зи хирел кьел.

Крар зуракI амаз жуван,

Зи рикIи ийизвай шуван:

«Агь, за крар гирт ийидай!

ЧIижери хьиз вирт ийидай!»

Алайла гьиссерин кимел,

Садлагьана квахьна чIимел,

Са умудди ифирна хур,

Кьезиларна рикIевай цIур.

Агакьна зав цаварай ван:

«Герек туш заз гьеле ви чан.

Гъиз жедач вун уьмуьрд цикIел,

Икьван къастар амаз рикIе».